როგორ შევარჩიოთ ინტერიერის დიზაინი ბინისთვის
ბინისთვის ინტერიერის დიზაინის შერჩევა მართლაც რთული გადაწყვეტილებაა. მისი სტილი ერთდროულად მფლობელის გემოვნებას, ხასიათსა და ინდივიდუალიზმს უნდა გამოხატავდეს და თან მოდური, კომფორტული, მოსახერხებელი და ფუნქციურიც იყოს. გასათვალისწინებელია ისიც, რომ ინტერიერს ხშირად ვერ ცვლით, ეს ფაქტორი კი პროცესს კიდევ უფრო საპასუხისმგებლოს ხდის.
დიზაინის სპეციფიკისა და მახასიათებლების დეტალურ გაცნობაზე დიდი დრო რომ არ დახარჯოთ, ჩვენი ბლოგპოსტი წაიკითხეთ. ამჯერად ინტერიერის ყველაზე გავრცელებულ და მოთხოვნად ტრენდებზე მოგიყვებით, პოპულარულ გადაწყვეტებზე გიამბობთ და საინტერესო რეკომენდაციებსაც მოგაწვდით.
ნეოკლასიკა
თანამედროვე ნეოკლასიკური სტილი ინტერიერს მდიდრულ, დახვეწილ იერს ანიჭებს, ამიტომ, როგორც წესი, ის იმ ადამიანებს მოსწონთ, რომლებსაც ფუფუნების ელემენტები იზიდავთ. გაითვალისწინეთ, რომ ნეოკლასიკური სტილის გამოყენება მკაცრ წესრიგს მოითხოვს. სივრცის ორგანიზებისას სიმეტრია და სისადავე აუცილებლად უნდა დაიცვათ. შეგიძლიათ, მისაღების ოთახის კედლები მინიმალისტური მოლდინგებით ან გეომეტრიული ფორმის, შუქგამტარი დეტალებით გააფორმოთ, ავეჯის ფასადზე კი შუშები გამოიყენოთ — ეს შტრიხი თქვენს ბინას კიდევ უფრო დახვეწილს გახდის.
სამზარეულოს ნეოკლასიკის სტილით მოწყობისას, სპეციალისტები ბოლო პერიოდში ძირითად აქცენტს კუნძულზე აკეთებენ. მიიჩნევა, რომ ეს მოსახერხებელი და, ამავდროულად, მოდური გადაწყვეტილება იდეალურად მიესადაგება დიზაინის ამ სტილს და თან ყოველდღიურობაშიც ძალიან კომფორტულია.
გაითვალისწინეთ, რომ ნეოკლასიკას აუცილებლად ღია ფერები და მაქსიმალური შუქი სჭირდება. სწორედ ეს ტონები ქმნის ბინაში თავისუფლებისა და სინათლის შეგრძნებას. ნეოკლასის მოყვარულებს დიზაინერები ჭერში ჩაშენებულ ნათურებს, კედლის ბრებსა და სარკის განათებებსაც ურჩევენ. სწორედ ამიტომ, ელექტროგაყვანილობის გამართვისას ეს ფაქტორიც გაითვალისწინეთ.
თანამედროვე კლასიკა
თუ კლასიკის მოგწონთ, მაგრამ ოდნავ უხეში ელემენტებიც გხიბლავთ, შეგიძლიათ, თანამედროვე კლასიკა აირჩიოთ. ეს სტილი უფრო მუქი ტონებით გამოირჩევა, ინტერიერი კი დეკორატიული პანელებითა და სხვადასხვა დონის განათებებითაა გამდიდრებული.
თანამედროვე კლასიკას ძალიან უხდება კვადრატული ფორმის ავეჯი და ფარული კარები. თუ დიზაინის თვალში საცემი ელემენტებით გამრავალფეროვნება გსურთ და ოქროსფერიც მოგწონთ, გირჩევთ, ზოგიერთი მცირე დეტალი ამ ტონში გადაწყვიტოთ: ეს შტრიხი თქვენი ბინის დიზაინს კიდევ უფრო უნიკალურს გახდის.
მინიმალიზმი
მკაცრი და სადა გარემოს მოყვარულებისთვის საუკეთესო არჩევანი მინიმალიზმია. ამ შემთხვევაში ყველაფერი მარტივია: არავითარი ზედმეტი დეტალი და ელემენტი, შთამბეჭდავი ან თვალში მოსახვედრი დეკორი. ბინაში მხოლოდ ის არის, რაც აუცილებლად გჭირდებათ.
თუმცა, ცხადია, ამ სისადავის მიღწევა კომფორტის ხარჯზე არ უნდა მოხდეს. გახსოვდეთ, რომ მინიმალიზმის სწორად გამოყენების შემთხვევაში, განსაკუთრებული ყურადღება ხარისხს ექცევა, ამიტომ გაითვალისწინეთ, თუ ამ სტილს აირჩევთ, ყველაფერი —კერამოგრანიტი, ხის პანელები თუ სხვა მასალები მაღალი კლასის უნდა იყოს. ეს ფაქტორი კი, სავარაუდოდ, ბინის რემონტის ბიუჯეტს გაგიზრდით.
თანამედროვე სტილი
თანამედროვე სტილი, როგორც დიზაინის ამ მიმართულებას ხშირად უწოდებენ, ბევრი ადამიანისთვის მართლაც რომ ფავორიტია. მოხერხებულობისა და უნივერსალობის გამო, ის განსაკუთრებით მოსწონთ.
შეიძლება ითქვას, რომ დღესდღეობით თანამედროვე სტილი მინიმალიზმის, ლოფტისა და კლასიკის შთამბეჭდავ სინთეზს წარმოადგენს და მათ საუკეთესო მახასიათებლებს აერთიანებს. შესაბამისად, შეგიძლიათ, მასალების სასურველი კომბინაციები გამოიყენოთ და, მაგალითად, ფილით, ხის პანელებითა და თუნდაც ბეტონის ჭერით, შთამბეჭდავი დიზაინი შექმნათ.
თანამედროვე სტილი ყველაზე მეტად პასტელურ ტონებს იხდენს, თუმცა ერთი მკვეთრი ფერის — ლურჯის, მწვანის ან ბოლო პერიოდში განსაკუთრებით ტრენდული ბორდოს შეტანა და დიზაინის გახალისება, ცხადია, შეგიძლიათ. თანამედროვე სტილი იმდენად მრავალფეროვანია, რომ საკუთარი გემოვნების შესაბამის ინტერიერს ნებისმიერი თქვენგანი იპოვის.
ფუჟენი
დიზაინის ეს სტილი ტრადიციული, ზოგჯერ ეთნიკური ელემენტებისა და კონტემპორარის სტილის ძალიან ეფექტური ნაზავია. ფუჟენი ბინას თითქოს ორი განსხვავებული სამყაროს მთლიანობად წარმოადგენს და ერთდროულად ოჯახურ და ინოვაციურ ატმოსფეროს ქმნის.
ამ სტილს ახასიათებს ნათელი ემოციები, რომელსაც უმეტესწილად კაშკაშა ფერების მასალები, ავეჯი და დეკორი ქმნის. თუმცა, ამავდროულად, ფუჟენი მარტივი ფორმებითა და მოსახერხებელი გამოყენებითაც ხასიათდება.
ამდენად, არჩევანი დიდია. როცა დიზაინზე ჩამოყალიბდებით, დომინოს ფილიალებში გვესტუმრეთ. ჩვენი მრავალფეროვანი პროდუქცია ინტერიერის სხვადასხვა სტილს იდეალურად ესადაგება. გაესაუბრეთ კონსულტანტებსაც, რომლებიც საუკეთესო გადაწყვეტილების მიღებაში დაგეხმარებიან.