ბინის გაქირავება საქართველოში ინვესტიციის ერთ-ერთი გავრცელებული და მომგებიანი გზაა. არაერთი ადამიანი ფართს კონკრეტულად ამ მიზნით ყიდულობს და შემდეგ სტაბილურ შემოსავალსაც იღებს. თუმცა, მდგმურების მოძებნამდე, ბინას მომზადება და თუნდაც მინიმალური განახლება აუცილებლად სჭირდება. სწორედ ასეთ დროს ხდება ხოლმე აქტუალური კითხვა: როგორ გავარემონტოთ გასაქირავებელი ბინა. ჩვენს ახალ ბლოგპოსტში ვეცდებით, საინტერესო პასუხები შემოგთავაზოთ და ტრადიციულად გაგიზიაროთ რჩევებიც, რომლებიც დაგეხმარებათ, გასაქირავებელი ბინის რემონტი მინიმალური დანახარჯებით, მარტივად დაასრულოთ, შედეგი დიდხანს შეინარჩუნოთ და ბევრი დამქირავებელიც მოიზიდოთ.
განსაზღვრეთ გაქირავების ტიპი
სპეციალისტების რჩევები მოკლედ რომ შევაჯამოთ, ასეთ დასკვნას მივიღებთ: საჭიროა, გასაქირავებელ ბინას ჰქონდეს თანამედროვე რემონტი, რომელიც არც ძალიან ძვირი დაგიჯდებათ და არც დიდ რესურსს მოითხოვს, მაგრამ მრავალფეროვან საცხოვრებელ მოთხოვნებს აუცილებლად დააკმაყოფილებს. ამ მიზნამდე მარტივად რომ მიხვიდეთ, უპირველესად უნდა ჩამოყალიბდით, რა ხანგრძლივობით გსურთ ბინის გაქირავება.
როგორც წესი, მდგმურებს მეპატრონეები სახლს გრძელვადიანად უთმობენ, ან ფართს დღიურად, Airbnb-ის, ან სხვა პორტალების დახმარებით აქირავებენ. რასაკვირველია, ეს გადაწყვეტილება ბინის ფართობსაც უკავშირდება: დიდი სახლი ხანგრძლივი დროით ქირავდება ხოლმე, პატარები კი უფრო — დღიურად და ტურისტული მიზნებით.
გაქირავების ტიპი გავლენას სივრცეების დაგეგმვაზე, რემონტსა და შესაბამისი მასალების შერჩევაზეც ახდენს. გამოცდილება აჩვენებს, რომ დღიურად გასაქირავებელი ბინა ავეჯით, ტექნიკითა თუ ფუნქციური სივრცეებით მაქსიმალურად პრაქტიკული უნდა იყოს, მაგრამ თუ არჩევანს გრძელვადიან მდგმურებზე გააკეთებთ, მაშინ მეტი ინვესტიციისა და კომფორტული პირობების გათვალისწინებაც დაგჭირდებათ.
საგულისხმოა ერთი მნიშვნელოვანი ფაქტორიც: ის მდგმურები, რომლებიც ბინაში დიდხანს ცხოვრებას გეგმავენ, შესრულებულ სამუშაოებსა თუ ავეჯს გაცილებით მეტი ყურადღებითა და პასუხისმგებლობით ეკიდებიან, ვიდრე ისინი, ვინც სახლს დღიურად ქირაობენ. შესაბამისად, უნდა გახსოვდეთ, რომ თუ არჩევანს ხანმოკლე ვადაზე გააკეთებთ, მინიმალური განახლებები უფრო ხშირად დაგჭირდებათ. ეს ფაქტორი რემონტის არცერთ ეტაპზე არ უნდა გამოგრჩეთ.
დაგეგმეთ ფუნქციურად
გასაქირავებელი ბინის ფუნქციური დაგეგმვისას, მით უფრო თუ მდგმურების განთავსებას მოკლე ვადით აპირებთ, ნაკლები მნიშვნელობა მიანიჭეთ სათავსოებსა და დიდ სამზარეულოს. უმჯობესი იქნება, თუ ძირითად აქცენტს დასაძინებელ სივრცეებსა და ტრანსფორმერ ავეჯზე - დასაკეც საწოლებზე, გასაშლელ დივნებსა და სავარძლებზე გააკეთებთ.
ბოლო წლებში დისტანციური მუშაობის რეჟიმის პოპულარობამ შესაბამისი დანიშნულების კუთხეზე მოთხოვნაც გაზარდა. მნიშვნელოვანია, რომ თუნდაც მცირე ფართში გამოყოთ ადგილი, სადაც სამუშაო გარემოს შექმნით. ეს თქვენს ბინას ნამდვილად დამატებით უპირატესობას შესძენს.
სარემონტო მასალები: რაზე დავზოგოთ და რაზე — არა
შეეცადეთ, სარემონტო მასალები არა ძვირადღირებული, არამედ მარტივად მოსავლელი იყოს. შეარჩიეთ ისეთი ფილა, კედლისა თუ იატაკის საფარი, რომლის დასუფთავება დიდ სირთულეს არ მოითხოვს. რასაკვირველია, მნიშვნელოვანია, გაითვალისწინოთ მათი განახლების სპეციფიკაც: გასაქირავებელ ბინაში მასალები ხშირად ზიანდება, ამიტომ შეცვლისთვის დიდი დროისა და ფინანსური რესურსის დახარჯვა არ უნდა დაგჭირდეთ.
თუმცა, არსებობს გამონაკლისები, რომლებზეც თანხის დაზოგვა არ ღირს, რადგან ეს გადაწყვეტილება სამომავლოდ შეიძლება დამატებით ინვესტიციად დაგიჯდეთ. მაგალითად, სანიტარული კვანძები და გაყვანილობა: მათი გამოცვლა რთულია და თან ძვირადღირებულიც, ამიტომ უმჯობესია, გასაქირავებელი ბინის შემთხვევაშიც, შესაბამისი სამუშაოები ხარისხიანი მასალითა და საიმედო ხელოსნის დახმარებით შესრულდეს. რაც მთავარია, არ დაგავიწყდეთ, რომ ახალი მდგმურის მიღებამდე თითოეული მათგანის ფუნქციონირება საგულდაგულოდ უნდა შემოწმდეს.
განსაკუთრებული ყურადღება გაამახვილეთ ელექტროგაყვანილობასა და განათებაზეც. დიდი სიხშირით ვერც კაბელებს გამოცვლით, ამიტომ მნიშვნელოვანია, მთლიანი გაყვანილობა, მათ შორის ჩამრთველები და როზეტები, მაქსიმალურად გამძლე, უსაფრთხო და ხარისხიანი იყოს.
რაც შეეხება განათებას, სპეციალისტების არჩევანი სხვადასხვა დონის ნათურების დამონტაჟებაზე ჩერდება. ეს რეკომენდაცია დაგეხმარებათ, ბინის სინათლის ხარისხი ნებისმიერი დამქირავებლის გემოვნებასა და ცხოვრების წესს მოარგოთ: ერთდროულად უპასუხოთ იმ ადამიანის მოთხოვნილებებსაც, რომლებსაც სახლში საღამოობით მუშაობა უწევთ და უბრალოდ სიმყუდროვის მოყვარული მდგმურების სურვილებიც დააკმაყოფილოთ. გაითვალისწინეთ ისიც, რომ გემოვნებიან, კარგად შერჩეულ განათებას ბინის დიზაინის გაცილებით ეფექტურად წარმოჩენა და არაერთი ნაკლის დაფარვა შეუძლია, ამიტომ მასში ინვესტირება ნამდვილად ღირს.
ხმის იზოლაცია და ჰიდროიზოლაცია
ბევრი ბინა, რომელიც გასაქირავებლად მიმზიდველ ადგილას მდებარეობს, ხმაურიან ქუჩას გადმოჰყურებს, რაც ხშირად დამქირავებლის სამართლიან უკმაყოფილებას იწვევს. ამ პრობლემის მოგვარებაში ხმის იზოლაცია დაგეხმარებათ და ერთჯერადი ფინანსური დანახარჯით დიდი ხნის განმავლობაში მოგემსახურებათ.
რაც შეეხება ჰიდროიზოლაციას, მისი მთავარი უპირატესობა უსაფრთხოებაა. არც ისე იშვიათია შემთხვევები, როცა, მდგმურების შეცდომის გამო, მეზობელთან წყალი ჩადის, უსიამოვნებები კი თქვენ გექმნებათ. ჰიდროიზოლაცია ამ შემთხვევების საუკეთესო პრევენცია იქნება, ამიტომ მის გამოყენებას აუცილებლად გირჩევდით.
დიზაინი და ფერები
ის, რაც თქვენ მოგწონთ, ყველას ვერ მოეწონება, ამიტომ სპეციალისტების რეკომენდაციით, უმჯობესია, გასაქირავებელი ბინის დაგეგმვისას მკვეთრად გამოხატული, ინდივიდუალური დიზაინისა და ფერებისგან თავი მაქსიმალურად შეიკავოთ. აირჩიეთ ნაკლებად გადატვირთული, მინიმალისტური სტილი და ღია, პასტელური, ნეიტრალური ფერები, რომლებიც, როგორც წესი, ადამიანების უმეტესობისთვის მისაღებია. მკაფიო დეტალებს, სურვილის შემთხვევაში, თავად დამქირავებლები დაამატებენ.
ამას გარდა, გაითვალისწინეთ, რომ ასეთი ნათელი ტონები სივრცეს ვიზუალურად ზრდის და გარემოსაც უფრო მიმზიდველად წარმოაჩენს.
გასაქირავებელი ბინის რემონტს თუ გეგმავთ, ჯერ დომინოში გვეწვიეთ. გარდა იმისა, რომ ჩვენს ფილიალებში საჭირო მასალებისა და ნივთების მრავალფეროვან არჩევანს ნახავთ, ჩვენი კონსულტანტების დახმარებით, ყველაზე ოპტიმალურ გადაწყვეტილებებსაც შეარჩევთ. მანამდე კი გადახედეთ ჩვენს ძველ ბლოგპოსტებსაც, რომლებიც რემონტის დროს გასათვალისწინებელ საინტერესო რეკომენდაციებსზე გიყვებათ.