ზაფხული აივნებსა და ეზოებში სასიამოვნო საღამოების გატარებისთვის საუკეთესო პერიოდია, მაგრამ  წელიწადის ამ დროს აბეზარი მწერები მოსვენებას გვიკარგავენ და სიგრილითა და სიმწვანით ტკბობაში ხელს გვიშლიან. რა თქმა უნდა, მათთან გასამკლავებლად არაერთი ქიმიური საშუალება არსებობს, თუმცა ამჯერად გვინდა, ბუნებრივ მცველებზე გიამბოთ — მცენარეებზე, რომლებიც მწერებს აფრთხობენ და ეზოსა თუ აივანს „დაუპატიჟებელ სტუმრებს“ არ აკავებენ.

ასე რომ, გაეცანით ჩვენს ბლოგპოსტს და დაუმეგობრდით მცენარეებს, რომლებიც არა მარტო სივრცეს გაგილამაზებენ, არამედ სიმშვიდესა და დაცულობასაც მოგანიჭებენ.

ლავანდა

დავიწყოთ ლავანდით, რადგან მწერებთან მებრძოლი მცენარეების ჩამონათვალში ის  პირველ საპატიო ადგილს დამსახურებულად იკავებს. სასიამოვნო სურნელი, რელაქსაციისა და მშვიდი ძილის ეფექტი ამ მცენარის გამორჩეული თვისებებია, თუმცა, ამავდროულად, ლავანდა შეიცავს ქაფურს — ნივთიერებას, რომელსაც მწერები განსაკუთრებით ერიდებიან, ამიტომ დარგეთ ეს მცენარე ეზოში, მოათავსეთ აივანზე ან თუნდაც ფანჯრის რაფაზე და ისიამოვნეთ ზაფხულით.

გაითვალისწინეთ, რომ ლავანდისგან შეგიძლიათ შესანიშნავი არომატული წყალიც დაამზადოთ და ის კოსმეტიკური თუ სამკურნალო დანიშნულებით გამოიყენოთ, ან მისი ყვავილები გაახმოთ და ჩრჩილის დასაფრთხობად, ტანსაცმლის კარადაში მოათავსოთ.

რეჰანი

თუ გამწვანების თანამედროვე ტრენდს მიჰყვებით და ეზოში ან აივანზე პატარა ბოსტანი გაქვთ, მაშინ რეჰანიც აუცილებლად უნდა გაახაროთ. გარდა იმისა, რომ ის მარტივი მოსავლელია, არომატული მცენარე კულინარიაშიც ძალიან გამოგადგებათ და მწერებთან ბრძოლაშიც. გაითვალისწინეთ, რომ შეგიძლიათ, რეჰანიც გაახმოთ და შემდგომში ამ სახითაც გამოიყენოთ.

პიტნა

ქალაქური ბოსტნის კიდევ ერთი პოპულარული წარმომადგენელი ეზოშიც სწრაფად მრავლდება, აივანზეც და ფანჯრის რაფაზეც. სასიამოვნო, სპეციფიკური სურნელისა თუ გემოს წყალობით, პიტნა არაერთი კერძის, ჩაის, ლიმონათისა და კოქტეილის შესანიშნავი ინგრედიენტია, თანაც, კოღოებსაც ეფექტიანად აფრთხობს. გაითვალისწინეთ, რომ პიტნა მწერის ნაკბენზეც შეგიძლიათ წაისვათ: ის ქავილსა და შეშუპებასაც აცხრობს.

ბარამბო (მელისა)

იმავეს გირჩევდით ბარამბოზეც, რომელიც პიტნას არა მარტო ვიზუალურად, არამედ სხვა მახასიათებლებით, მათ შორის მწერებთან ბრძოლითაც წააგავს. თუმცა, უნდა გაითვალისწინოთ, რომ კოღოებისგან განსხვავებით, ის კატებს განსაკუთრებულად უყვართ და თუ ფისოები გყავთ, მოგიწევთ, მეტად ყურადღებით იყოთ.

როზმარინი

მძაფრი არომატის გამო, კულინარიასა და ხალხურ მედიცინაში გამოყენების გარდა, დამატებით ფუნქციებს კიდევ ერთი შესანიშნავი მცენარე — როზმარინი ითავსებს. ის ხორციან კერძებსაც უხდება და ეზოსა თუ აივანზე მყუდრო, მწერებისგან დაცული გარემოს შექმნაშიც გეხმარებათ.

ხავერდა (ყვითელი ყვავილი)

ხავერდა, იგივე ყვითელი ყვავილი, ცნობილი სანელებელი, იმუნიტეტის გამაძლიერებელი, ბუნებრივი დეზინფექტორი და, ამავდროულად, მწერებთან მებრძოლი მცენარეა. სილამაზესთან ერთად, ის სრულიად უპრეტენზიოა და ძალიან მარტივად მრავლდება. ასე რომ, თამამად შეგიძლიათ დარგოთ ეზოშიც და აივანზეც.

ციტრონელა

ინტენსიური სურნელის მქონე ციტრონელა მის გარშემო მდებარე სივრცეს მწერებს არ აკარებს, ამიტომ ის სხვა მცენარეებსაც კარგად იცავს. სხვათა შორის, არსებობს ციტრონელას არომატული სანთლებიც, რომლებსაც მწერებთან ბროძლის იგივე ეფექტი აქვს.

პირეტრუმი

პირეტრუმი, ან სპარსული გვირილა, როგორც მას ხშირად უწოდებენ, მძაფრი სურნელით გამოირჩევა. პრეტრუმის ყვავილი გარკვეული რაოდენობით პირეთრინს შეიცავს — ნივთიერებას, რომლისგანაც მწერების საწინააღმდეგო აეროზოლები და სპრეები მზადება. ეს კი ბუნებრივად იცავს მის ირგვლივ არსებულ გარემოს მწერებისგან. პირეტრუმი ყველგან შეგიძლიათ დარგოთ, მთავარია, ამ მცენარეს მზე და წყალი არ მოაკლოთ.

ქრიზანთემა

სპარსული გვირილის მსგავსად, ქრიზანთემაც პირეთრინის შემცველია და მწერებთან ერთად, სხვა მავნებლებსაც ებრძვის. ქრიზანთემა თქვენს გამწვანებაში განსაკუთრებულ ფერებსაც შეიტანს, ოღონდ გაითვალისწინეთ, რომ მზის სინათლე გამორჩეულად უყვარს.

ლიმონის კატაპიტნა

მრავალწლოვანი კატაპიტნა მარტივად მოსავლელი, ყინვაგამძლე მცენარეა და ერთი შეხედვით ბარამბოს მოგაგონებთ. ის მწერებს, განსაკუთრებით კი კოღოებს, შესანიშნავად აფრთხობს, თუმცა გაითვალისწინეთ, რომ კატებზე კატაბალახას მსგავსად მოქმედებს, ამიტომ მათ აუცილებლად მოარიდეთ.

ნემსიწვერა

ინტენსიური არომატით ნემსიწვერა კოღოებსა და ბუზებსაც უმკლავდება და თან ულამაზესი ფერებით ეზოსა და აივანს ალამაზებს. მცენარე მარტივი მოსავლელია, თუმცა, გაითვალისწინეთ, რომ სპეციფიკური სუნის გამო, ზოგჯერ ის ადამიანებსაც არ მოსწონთ.

ბუნებრივ პესტიციდად მიიჩნევა პეტუნია, დედოფლის ყვავილი, ლანთანა, ჟასმინი, დაფნა, კამა, ცერეცო, ხახვი, ნიორი და პრასი. ასე რომ, არჩევანი დიდია. სწორედ ამიტომ, დომინოს ბაღში უნდა გვესტუმროთ და მწერებთან მებრძოლი მწვანე მეგობრები ჩვენს მებაღეებთან ერთად შეარჩიოთ.