საქართველოში ბევრი ადამიანისთვის საკუთარი ღვინის დაწურვა-დაყენება დიდი ხნის ტრადიციაა, ზოგსაც პირველი ნაბიჯების გადადგმა ახლა სურს და ცდილობს, ამ მიმართულებით გარკვეული ცოდნა მიიღოს. თუმცა, კარგი შედეგისთვის მხოლოდ მომზადების ტექნოლოგიის სწავლა ან საუკეთესო ყურძენი საკმარისი არ არის, მნიშვნელოვანია ის აღჭურვილობაც, რომელიც მართლაც საუკეთესო ღვინის დაყენებაში დაგეხმარებათ. რადგან რთველი სულ მალე იწყება, გვინდა, იმ მოწყობილობებზე გიამბოთ, რომლებიც ამ პროცესში აუცილებლად დაგჭირდებათ. გადახედეთ ახალ ბლოგპოსტს და გაეცანით ჩვენს რეკომენდაციებს.

ყურძნის საწური და წნეხი

ყურძნის მოსახერხებელი, მაღალი წარმადობის, მრავალფეროვანი ელექტრო ან მექანიკური საწურების დახმარებით უკვე შეგიძლიათ, შრომა ძალიან შეიმსუბუქოთ, მით უმეტეს, რომ ზოგიერთ მათგანს კლერტის გაცლის ფუნქციაც აქვს, რაც ყურძნის დაწურვის პროცესს განსაკუთრებით ამარტივებს. დღესდღეობით ბაზარზე სხვადასხვა ზომისა და ფორმის, მასალისა და ფასის საწურებია ხელმისაწვდომი, ამიტომ სასურველი მოწყობილობის შერჩევას აუცილებლად შეძლებთ. დამატებით აღჭურვილობად გამოგადგებათ წნეხი, რომელიც ყურძნის წვენის მიღებაში დაგეხმარებათ. გაითვალისწინეთ, რომ არსებობს ფილტრის წნეხებიც, რომლებიც საყოფაცხოვრებო პირობებში ღვინის მაღალი ხარისხის ფილტრაციისთვისაა განკუთვნილი.

ღვინის ტუმბო
მეღვინეებისთვის კარგად ცნობილია კიდევ ერთი მოწყობილობა — ღვინის ტუმბო, რომელსაც თვითშესრუტვის ფუნქცია აქვს. ზოგიერთი მათგანი კი ფილტრაციითაცაა აღჭურვილი და მაღალი სტანდარტით ასუფთავებს სასმელს, თანაც ისე, რომ მისი გემოვნური თვისებები და ხარისხი უცვლელი რჩება.

ალკოჰოლისა და შაქრის საზომი ხელსაწყოები
ალკოჰოლისა და შაქრის შემცველობის შემოწმება ღვინის მომზადების პროცესის უმნიშვნელოვანესი კომპონენტია. ალკოჰოლის თერმომეტრი და შაქრის საზომი ხელსაწყოები დაგეხმარებათ, სითხეში სპირტისა თუ შაქრის კონცენტრაცია მარტივად შეამოწმოთ, კორექტირებები შეიტანოთ და ღვინის სხვადასხვა ვარიაცია შექმნათ. დღესდღეობით მწარმოებლები რეფრაქტომეტრებსაც გვთავაზობენ — პორტატიულ ხელის მოწყობილობებს, რომლებიც ალკოჰოლისა და შაქრის შემცველობას ერთდროულად ზომავს. ამას გარდა, მეღვინეობაში კარგად ნაცნობია მჟავიანობის საზომიც, რომელიც სხვადასხვა სახის ღვინის დასამზადებლად გამოიყენება.

საჰაერო სარქველი საცობით
საჰაერო სარქველი, რომელსაც სპეციალური საცობიც აქვს, ფერმენტაციის პროცესს ამარტივებს. მისი გამოყენების შედეგად კი, ღვინო ჟანგბადისგან სრულად იზოლირებულია. ამას გარდა, საჰაერო სარქველი სასმელს ბაქტერიებისა და დამჟავებისგან იცავს. თუ შედარებით დიდი რაოდენობის ღვინის დამზადებას აპირებთ, მაშინ ეს მოწყობილობა ძალიან გამოგადგებათ.

მილი და სიფონი
სასმლის ერთი ჭურჭლიდან მეორეში გადასატანად მილები და სიფონი აუცილებლად დაგჭირდებათ. ისინი თქვენს სასმელს არასასურველი რეაქციისა და ნალექისგან დაიცავს. სხვათა შორის, შეგიძლიათ, სიფონიანი მილით ისარგებლოთ, რომელსაც სასმლის ნაკადის დასარეგულირებლად ონკანიც აქვს. შეხვდებით მილებს სიფონის გარეშეც, რომლებიც სახლის პირობებში ღვინის გადასატანად ასევე კარგი არჩევანია.

ბოცები და ბოთლები

ღვინის შესანახად მწარმოებლები სხვადასხვა ზომის, ფორმისა და მასალის ბოცებსა და ბოთლებს გვთავაზობენ: გამჭვირვალეს, ფერადს, პლასტმასისა თუ მინისგან დამზადებულს. ასე რომ, არჩევანი თქვენს გემოვნებასა და საჭიროებებზეა დამოკიდებული. თუმცა, ღვინისთვის საუკეთესო 750 მლ-ის მოცულობის შუშის ბოთლებია, რომლებიც სასმელს იდეალურად ინახავს. და თუ უფრო დიდი მოცულობის ჭურჭელი გჭირდებათ, მაშინ ხარისხიანი, უჟანგავი ფოლადის კასრები დაგჭირდებათ, რომლებსაც პნევმატიკური ხუფიც აქვს, წნევის საზომიც და ონკანიც.

ღვინის ჩამოსასხმელი
ფერმენტაციის პროცესი რომ დასრულდება, შემდეგ სასმელი ბოთლებში უნდა ჩაასხათ. ამ პროცესს კი სპეციალური მოწყობილობა — ღვინის ჩამოსასხმელი გაგიმარტივებთ: ის დროსა და ენერგიას შესამჩნევად დაგიზოგავთ.

საცობები
ღვინოს საუკეთესო თვისებები რომ შეუნარჩუნოთ, ხარისხიანი საცობები უნდა გამოიყენოთ. სწორედ ისინი იცავენ თქვენს ნახელავს ბაქტერიებისა და ჟანგბადის შეღწევისგან. ასე რომ, კარგად შერჩეული საცობი დაგეხმარებათ, სასმელი იდეალურად შეინახოთ. გაითვალისწინეთ, რომ კორპის საცობების მრავალსახეობასთან ერთად, შეგიძლიათ, სილიკონის, ნახშირბადის ფილტრიანი საცობებითაც ისარგებლოთ, რომლებიც ბოთლში ჟანგბადის მოლეკულებს შთანთქავს. სხვათა შორის, სპეციალური საცობი აპარატიც არსებობს, რომელიც ღვინის დალუქვის პროცესს გაცილებით მოსახერხებელს გახდის.

თითოეული მოწყობილობა ყურძნის დაწურვასა და ღვინის დამზადებას მნიშვნელოვნად გაგიმარტივებთ, თუმცა დამატებითი და უფრო დეტალური რეკომენდაციებისთვის „დომინოში“ გვესტუმრეთ. ჩვენი კონსულტანტები მოწყობილობებსა თუ ხელსაწყოებსაც შეგარჩევინებენ და შესაბამისი რჩევებითაც დაგეხმარებიან.