ხმის იზოლაცია მყუდრო და კომფორტული სახლისთვის

ხმის იზოლაციას ხშირად კომფორტის ტექნოლოგიას უწოდებენ და ზედმეტ ფუფუნებად მიიჩნევენ. თუმცა, თუ გავითვალისწინებთ რამდენად ხშირი და არასასიამოვნოა ხმაური ჩვენს ყოველდღიურობაში, მისი გამოყენება არც ზედმეტ ძალისხმევად გვეჩვენება და არც - უსარგებლო ფინანსურ ხარჯად. რა თქმა უნდა, ტექნოლოგიის მნიშვნელობა და ფუნქციურობა კიდევ უფრო იზრდება მაშინ, როცა სახლში მცირეწლოვანი ბავშვები გვყავს.  

ხმაურის იზოლაციისთვის თანამედროვე მწარმოებლები საინტერესო კომპლექსურ და მრავალფეროვან გადაწყვეტილებებს გვთავაზობენ. ჩვენს ახალ ბლოგპოსტში სწორედ მათი შერჩევის კრიტერიუმებზე მოგიყვებით და თქვენს ბინაში მყუდრო, ჯანსაღი გარემოს შესაქმნელად, სასარგებლო რჩევებსაც გაგიზიარებთ. 

როგორ იწყება ხმის იზოლაციის შერჩევა

უპირველესად განსაზღვრეთ, თქვენი ბინის მდებარეობა და ხმაურის ტიპი, რომელიც გაწუხებთ, ან შეგაწუხებთ. საჭიროებები ამ შემთხვევაშიც გადამწყვეტ როლს თამაშობს. წინასწარ ჩამოყალიბდით, უპირატესობას გარედან შემოსული, შედარებით მაღალი ხმის ჩახშობას ანიჭებთ, თუ აქცენტს შიდა სივრცეებზე აკეთებთ და, მაგალითად, ბავშვების ოთახის სიმშვიდე ან სააბაზანოს ხმაურის იზოლაცია გსურთ. მასალები და მათი სპეციფიკა — ცეცხლგამძლეობა, მდგრადობა და ა.შ. სწორედ ამ გადაწყვეტილების მიხედვით უნდა შეირჩეს.

კრიტერიუმები, რომლებიც მასალების შერჩევისას დაგჭირდებათ

დასაწყისისთვის უნდა აღინიშნოს, რომ ხმის იზოლაცია ჭერზე, კედლებსა და იატაკზე კეთდება. საჭირო ტექნოლოგიებს ყველა მათგანისთვის მარტივად მოიძიებთ. თანაც, როგორც წესი, ისინი თავსებადია გავრცელებულ სარემონტო მასალებთან: გასაჭიმ ან თაბაშირ-მუყაოს ჭერთან, კედლების საფართან, ლამინატსა თუ პარკეტთან.

რაც შეეხება თავად ტექნოლოგიას: ხმის იზოლაციისთვის ამჟამად მწარმოებლები, ძირითადად, მინერალურ ბამბას, ქვაბამბასა და პოლიეთილენს გვთავაზობენ. თითოეული მათგანს აქვს როგორც რულონები, ისე ფილები და საკმაოდ მარტივადაც მონტაჟდება. განსაკუთრებით იოლია რულონების გამოყენება იმ ადამიანებისთვის, რომლებიც რემონტს საკუთარი ხელით აკეთებენ. თუმცა, უნდა გავითვალისწინოთ, რომ მასალის ეს ტიპი შედარებით მსუბუქი ხმაურის ჩასახშობადაა განკუთვნილი, ფილები კი მეტი მასშტაბის ხმას უმკლავდება.

ბოლო პერიოდში ხმაურის იზოლაციისთვის გავრცელებულია კორპის მასალაც. ის სხვადასხვა ფერის კომბინაციითაა ხელმისაწვდომი, თუმცა, ამავდროულად, ძვირადღირებულია და ხანგრძლივ სამუშაოებსაც მოითხოვს.

მასალების შერჩევისას ერთი ზოგადი რეკომენდაციაც არ გამოგრჩეთ: აუცილებლად შეიძინეთ ტექნოლოგია, რომელიც ეკოლოგიურად სუფთა და ნესტის მიმართ მდგრადი იქნება.

როდის მონტაჟდება ხმის იზოლაცია

ჯერ კიდევ რემონტის დაწყებამდე ზუსტად უნდა იცოდეთ, გსურთ თუ არა ხმის იზოლაციის გამოყენება, რათა სამუშაოების ხარჯებში საჭირო ფინანსები წინასწარ გაითვალისწინოთ და ტექნოლოგიაც რემონტის შესაბამის ეტაპზე დაამონტაჟოთ.

რაც შეეხება თავად ეტაპებს, გახსოვდეთ, რომ ხმის იზოლაცია ე.წ. შავი სამუშაოების ნაწილია. ჭერის შემთხვევაში, ჯერ ის მონტაჟდება, შემდეგ კი თავად გასაჭიმი ან თაბაშირ-მუყაოს მასალა. გაითვალისწინეთ, რომ ზოგი ტექნოლოგია კედლების გალესვის შემდეგ გამოიყენება, ზოგიც - გალესვამდე. იგივე პრინციპია იატაკის ხმის იზოლაციისას: მას ან მოჭიმვამდე იყენებენ, ან ზედა საფარის დაგებამდე. შესაბამისად, მასალის შეძენისას დამონტაჟების დრო აუცილებლად იკითხეთ და სამომავლო გაუგებრობის თავიდან ასაცილებლად, ხელოსანთან წინასწარი კონსულტაციაც გაიარეთ.

მულტიფუნქციურობა: ხმისა და სითბოს ერთდროული იზოლაცია

ხმის იზოლაციის ერთი ძალიან კარგი მახასიათებელი მულტიფუნქციურობაა. ხშირად ეს ტექნოლოგია, თუნდაც ნაკლებად ძვირადღირებული მინერალური ბამბა, სითბოს იზოლაციის ფუნქციასაც ასრულებს. შესაბამისად, მისი გამოყენება გეხმარებათ, სახლში არა მარტო სიმშვიდე, არამედ სასურველი ტემპერატურაც შეინარჩუნოთ, ენერგოეფექტურობა გაზარდოთ და პერსპექტივაში კომუნალური გადასახადებიც შეამციროთ.

ასე რომ, ხმის იზოლაციაზე ფინანსების ეკონომია არ ღირს. სულ უფრო მეტი სპეციალისტი გირჩევთ, რომ მაშინაც კი, როცა ხმაური დიდად არ გაწუხებთ, ამ ტექნოლოგიაზე უარი არ თქვათ, რადგან არავინ იცის, როგორი ახალი მეზობელი გეყოლებათ ხვალ. თუ თქვენ ახლა სწორედ რემონტის საწყის ეტაპზე ხართ, გირჩევთ, „დომინოს“ ფილიალებში შემოგვიაროთ. ჩვენი კონსულტანტები პროფესიული რეკომენდაციებით ხმის იზოლაციის შერჩევასა და მართლაც კომფორტული ატმოსფეროს შექმნაში დაგეხმარებიან. თანაც, „დომინო“ 10 წლის ხდება და ამ თარიღთან დაკავშირებით, 7 და 8 ივნისს ორივე ფილიალსა თუ ონლაინ 50%-მდე ფასდაკლება დაგხვდებათ.