როგორ მოვაწყოთ სახლში ბიბლიოთეკა

დაახლოებით 15 წლის წინ, როცა ელექტრონული წამკითხველები გამოჩნდა, ბევრი ადამიანი ფიქრობდა, რომ ნაბეჭდი წიგნები უკანასკნელ დღეებს ითვლიდა. თუმცა, მოლოდინები — გადაჭარბებული, დასკვნები კი მცდარი აღმოჩნდა: წიგნი ტექნოლოგიურმა პროგრესმა ვერ ჩაანაცვლა, საოჯახო ბიბლიოთეკა კი კვლავაც სახლის ინტერიერის მნიშვნელოვან ნაწილად დარჩა.

წიგნები, სივრცეს არა მარტო სიმყუდროვეს, არამედ ინდივიდუალურ შტრიხებსაც სძენს, ამიტომ ბიბლიოთეკის მოწყობას თანამედროვე დიზაინერები განსაკუთრებულ ყურადღებას უთმობენ და არც თუ უსაფუძვლოდ. ეს თემა, მართლაც, საკმაო დაფიქრებასა და ზედმიწევნით შერჩეულ მიდგომებს მოითხოვს, ამიტომ ჩვენს ბლოგპოსტში სწორედ საოჯახო ბიბლიოთეკის ორგანიზებაზე გიამბობთ. მოგიყვებით, როგორ შეგიძლიათ, წიგნები თქვენი სახლის უნიკალურ ნაწილად აქციოთ.

პირველი ნაბიჯი: სად განვათავსოთ ბიბლიოთეკა

რასაკვირველია, ბიბლიოთეკისთვის საუკეთესო გადაწყვეტა ცალკე ოთახის გამოყოფაა. ამ შემთხვევაში ეს სივრცე გაცილებით მყუდრო და ფუნქციურად დატვირთული იქნება, მით უფრო, თუ იქვე სამუშაო ან უბრალოდ კომფორტულ და მოსახერხებელ საკითხავ კუთხესაც მოაწყობთ.

თუმცა, თუ ბიბლიოთეკისთვის ასეთი განცალკევებული სივრცე არ გაქვთ, შეგიძლიათ, დახვეწილი სტელაჟები მისაღების ერთ-ერთ კედელზე, მთელ სიგრძეზე განათავსოთ, ან ჩააშენოთ. კარგი ვერსიაა თაროებიანი კარადის სამუშაო კუთხეში განთავსება, ან სულაც კარებთან ან ფანჯრებთან არსებული სივრცეების გამოყენებაც. რა თქმა უნდა, ყველა სახლი, განსაკუთრებით თუ ის პატარაა, არ იძლევა მდიდარი და მასშტაბური ბიბლიოთეკის მოწყობის საშუალებას, თუმცა გული ნუ დაგწყდებათ: თქვენი ინდივიდუალიზმისა და გემოვნების აქცენტირება მცირე სტელაჟებითაც შეგიძლიათ.

სხვათა შორის, მცირე ბიბლიოთეკის განთავსების ერთ-ერთი ხერხი ფანჯრების ქვედა ნაწილში წიგნების კომპაქტური თაროების განლაგებაა. ასეთ შემთხვევაში ბინის სივრცესაც მოხერხებულად დაზოგავთ და დიზაინში სახასიათო შტრიხსაც შეიტანთ. 

ბოლო პერიოდში პოპულარულია ფანჯარასთან სამკითხველო კუთხის მოწყობაც. თუ წიგნების თაროებთან ერთად, მცირე ზომის რბილ ავეჯსა და ფუმფულა ბალიშებსაც განათავსებთ, უფროსებისა თუ ბავშვებისთვის შესანიშნავ დასასვენებელ სივრცეს მიიღებთ.

რამდენი და როგორი სათავსო გამოვიყენოთ

ადგილის შემდეგ თაროების შერჩევის ჯერი დგება. მნიშვნელოვანია, განსაზღვროთ ღია თაროებს გამოიყენებთ, თუ შემინულს. ორივეს საკუთარი დადებითი და უარყოფითი მხარეები აქვს: შემინული თაროები სისუფთავეს უკეთ ინარჩუნებს, ბევრად მარტივად ლაგდება და განსაკუთრებით იმ ადამიანებისთვისაა კომფორტული, ვისაც ალერგია აწუხებს. სამაგიეროდ, ღია თაროები გაცილებით ეფექტურად გამოიყურება, გამოსაყენებლადაც მოსახერხებელია და ვიზუალურადაც მეტად მიმზიდველი. 

აუცილებელია, გაითვალისწინოთ იმ სივრცის ზომაც, სადაც ბიბლიოთეკა უნდა განათავსოთ. ხშირად ადამიანები მისი მოწყობისას ფართობს მხოლოდ იმდენ წიგნზე გათვლიან ხოლმე, რამდენიც ამჟამად აქვთ. სინამდვილეში კი, აუცილებელია ბიბლიოთეკა ისე დაგეგმოთ, რომ სივრცის დაახლოებით 30% თავისუფალი სამომავლო შენაძენებისთვის დატოვოთ. გახსოვდეთ წიგნების სიმძიმეც: როგორც წესი, ისინი არც თუ ისე მსუბუქია, ამიტომ მნიშვნელოვანია, ნებისმიერი კონსტრუქცია მაქსიმალურად მყარი და საიმედოდ დამაგრებული იყოს.

ბიბლიოთეკის სტილი

თაროების, სტელაჟებისა და დეკორების მასალების, ფერებისა თუ სტილის შერჩევისას აუცილებლად გაითვალისწინეთ სახლის საერთო დიზაინი. უმჯობესია, ისინი ინტერიერს შეუხამოთ, თუმცა ზოგჯერ დიზაინერები განსხვავებულ გადაწყვეტილებას იღებენ და სახასიათო, გამორჩეული ფერებით ბიბლიოთეკის ავეჯს განსაკუთრებულ შტრიხად აქცევენ. რასაკვირველია, იგივე რჩევა ეხება ამ სივრცეში განთავსებულ სამუშაო მაგიდას, სავარძელს ან დივანს.

რამდენიმე დამატებითი რეკომენდაცია სპეციალისტებისგან: ბიბლიოთეკისთვის განკუთვნილი სივრცის დასაზოგად, შეგიძლიათ, გასასრიალებელი ან დასაკეცი შიდა კარი გამოიყენოთ. რაც შეეხება სტელაჟებს, კარგი გადაწყვეტილება იქნება დახურული თაროების იმგვარად განთავსება, რომ წიგნებმა ტიხრის ფუნქციაც შეითავსოს.

კიდევ ერთი საკითხი თავად წიგნების წყობა და ფერებია. მიიჩნევა, რომ მათი ტონებისა და ზომების მიხედვით განლაგება უფრო ჰარმონიული და სოლიდურია, თუმცა საპირისპირო არჩევანი და ერთგვარი „დაგეგმილი არეულობა“  ბიბლიოთეკას მეტ დინამიკურობასა და სიცოცხლეს შესძენს. 

ბიბლიოთეკის განათება ბიბლიოთეკის ან თუნდაც მხოლოდ მარტივი თაროების მოწყობისას განსაკუთრებული ყურადღება განათებას მიაქციეთ. რა თქმა უნდა, გაცილებით მოსახერხებელია, როცა ამ სივრცეს ბუნებრივი შუქი ხვდება, თუმცა მისი ნაკლებობის დაბალანსება ხელოვნური განათებითაც შეგიძლიათ. ამდენად, გაითვალისწინეთ, რომ კარადებსა და თაროებში ჩაშენებული ლენტური განათება, რელსის ტიპის ან მაგიდის სანათები აუცილებლად დაგჭირდებათ. გახსოვდეთ ისიც, რომ იქ, სადაც ადამიანები კითხულობენ, უმჯობესია, ნეიტრალური ნათება გამოიყენოთ, მით უფრო, თუ ამავე სივრცეში სამუშაო კუთხის მოწყობასაც გეგმავთ.

ბიბლიოთეკის დაგეგმვასა და მოწყობამდე “დომინოს” ფილიალებში შეგიძლიათ გვესტუმროთ და ჩვენს კონსულტანტებთან ერთად შეარჩიოთ ნივთები, რომლებიც ამ სივრცის მარტივად ორგანიზებაში დაგეხმარებათ.