ჭერის სიმაღლე ბინის დახვეწილ და ეფექტურ ინტერიერში მნიშვნელოვან როლს თამაშობს. თუმცა, ხშირია შემთხვევები, როცა ის შედარებით დაბალია, ამიტომ დიზაინერებსა თუ არქიტექტორებს, ვიზუალური ეფექტის მისაღებად, განსხვავებული გადაწყვეტილების მოფიქრება უწევთ. სხვათა შორის, ასეთ დროს მათი რჩევები არა მარტო ჭერს, არამედ კედლებს, ავეჯსა და იატაკსაც კი ეხება. მეტი სიმაღლისთვის მართლაც ყველაფერი მნიშვნელოვანია: მასალებიც, ფაქტურაც, ფერებიც, განათებაც და განლაგებაც.
ამ ბლოგპოსტში გიამბობთ, რა რეკომენდაციები უნდა გაითვალისწინოთ ბინის რემონტის ან მოწყობის დროს, რათა ინტერიერში თავადვე შეიტანოთ ისეთი მარტივი შტრიხები, რომლებიც ჭერის სიმაღლეს და, შესაბამისად, მთლიანად ბინის ფართსაც გაგიზრდით.
კედლები
დაბალჭერიან ბინაში უპირველესად კედლების შესაბამის დამუშავებაზე უნდა იფიქროთ. სასურველი შედეგის მისაღებად, შეგიძლიათ, ხაზებით, გეომეტრიული ფიგურებით ან ვერტიკალურად განლაგებული სხვა ნახატებით, თუნდაც ყვავილებით გაფორმებული საფარი გამოიყენოთ. მთავარია, პრინტი იატაკიდან ჭერამდე წყვეტის გარეშე ადიოდეს, ინტერიერს ჰარმონიულად ეხამებოდეს და ზედმეტ ყურადღებას არ იქცევდეს. ეს ხერხი, ალბათ, ერთ-ერთი ყველაზე მარტივი გამოსავალია, მით უფრო, რომ მწარმოებლები შპალერისა თუ დეკორის ფართო არჩევანს გთავაზობენ.
სპეციალისტების რეკომენდაციით, დაბალჭერიან ბინაში კედლების გასაფორმებლად სხვადასხვა ფაქტურისა და ფერის ვერტიკალური პანელების დამონტაჟებაც კარგი გადაწყვეტილება იქნება. თანაც, ისინი ფართის ფუნქციური ზონირებისთვისაც შეგიძლიათ გამოიყენოთ და ბინის დიზაინში მეტი სიმყუდროვეც შეიტანოთ.
ფერები
ჭერის შერჩევისას, რა თქმა უნდა, ფერებთან დაკავშირებული რეკომენდაციები უნდა დავიწყოთ თეთრით, რომელიც არა მარტო ჭერის სიმაღლეს, არამედ მთლიანად სივრცის ფართობს ზრდის. მეტი შედეგის მისაღებად, უმჯობესია, არა გლუვი, არამედ პრიალა ან ნახევრად პრიალა საფარი შეარჩიოთ, მათ შორის იატაკისთვისაც. ასეთ დროს სინათლის არეკვლით ეფექტი კიდევ უფრო გაიზრდება.
სხვათა შორის, თეთრის გარდა, ცივი ფერების გამაც, მაგალითად, ცისფერი და მისი ტონებიც გამოგადგებათ. ზოგადად, გაითვალისწინეთ, რომ ჭერი მაქსიმალურად მაღალი მაშინ ჩანს, როცა ის კედლების ფერია. ბოლო პერიოდში სპეციალისტები ნახევარი ან ერთი ტონით ღია საფარსაც ირჩევენ, რადგან ამგვარი გადაწყვეტა, კარგი განათების შემთხვევაში, მართლაც შთამბეჭდავ შედეგს იძლევა.
დაბალი სიმაღლის ჭერის ნახატებით ან სხვადასხვა ფერის კომბინაციებით გაფორმება და ზედმეტი ყურადღების მიქცევა მიზანშეწონილი არ არის. თუმცა, ზოგჯერ დიზაინერები ომბრეს ეფექტს იყენებენ: კედლებს ჭერთან სიახლოვეს ყველაზე ღიად ღებავენ, შემდეგ კი თანდათან ამუქებენ.
მოლდინგები და ჭერის პლინტუსები
დაბალჭერიან ბინაში პლინტუსებსა და მოლდინგებზე უარი უნდა თქვათ. რაც უფრო ნაკლებად შესამჩნევი იქნება ზღვარი ჭერსა და კედლებს შორის, მით უფრო დიდი გამოჩნდება მისი სიმაღლე. გაითვალისწინეთ, რომ გადასვლა მაქსიმალურად ბუნებრივი და შეუმჩნეველი უნდა იყოს. გირჩევთ, კარნიზებიც მარტივი ფორმის, ნაკლებად მასიური შეარჩიოთ, რომ სივრცე რაც შეიძლება ნაკლებად გადატვირთული იყოს. თუ ჭერს თაბაშირ-მუყაოს ფილებით დაფარავთ, შეგიძლიათ, კარნიზები არც გამოიყენოთ და საფარდე პირდაპირ ჭერში ჩააშენოთ.
განათება
სწორი და კარგად შერჩეული განათება დაბალჭერიანი ბინის მოწყობის ერთ-ერთი საკვანძო ფაქტორია. გაყვანილობის დამონტაჟებისთანავე გაითვალისწინეთ, რომ ამგვარ სივრცეში დიდი, მასშტაბური ჭაღი ზედმეტი იქნება, ამიტომ სჯობს, უპირატესობა ჩაშენებულ ნათურებს, ლენტურ და საფარდე განათებებს მიანიჭოთ.
გამოიყენეთ კედლების ბრები და სანათები, თუმცა განათების ორგანიზებისას არ დაგავიწყდეთ ერთი მთავარი პრინციპის დაცვა: თუ გსურთ, რომ სიმაღლე ვიზუალურად მეტი გამოჩნდეს, შუქი აუცილებლად ქვემოდან ზემოთ უნდა მიემართებოდეს.
კარები, სარკეები და ფარდები
სივრცის გასაზრდელად სარკეების გამოყენება საკმაოდ გავრცელებული ხერხია. ჭერზე სრულად ან ნაწილობრივ დამაგრებული სარკე შუქს ირეკლავს და ინტერიერს სიღრმესაც მატებს. ამ ეფექტს კიდევ უფრო ზრდის ჭერიდან იატაკამდე დაშვებული, ღია ფერის, ვერტიკალური პრინტით გაფორმებული და მსუბუქი ქსოვილის ფარდები. ზოგადად, გაითვალისწინეთ, რომ დაბალჭერიან ბინაში მოკლე ფარდების დაკიდება გაუმართლებელია.
რაც შეეხება შიდა კარებს, კარგი გადაწყვეტილებაა იატაკიდან ჭერამდე, მთლიან სიმაღლეზე ჩასმული ან ფარული კარის გამოყენება, თუმცა, გაითვალისწინეთ, რომ ეს შედარებით მაღალბიუჯეტური ვერსიებია. ალტერნატიულ ვარიანტებად დიზაინერები გასასრიალებელ შუშის კარს ირჩევენ, ან სივრცეებს ფუნქციურად უბრალოდ თაღებით ან ტიხრებით გამოყოფენ.
ავეჯი
დაბალჭერიან ბინაში ავეჯის განლაგების მთავარი წესი ასეთია: არ გამოიყენოთ მასიური, დიდი ზომის ავეჯი და არაფერი განათავსოთ ფანჯრებთან, მით უფრო მაშინ, როცა ლამაზი ხედი გაქვთ. რაც შეეხება ფუნქციურ განაწილებას, გახსოვდეთ, რომ მისაღები ოთახის ავეჯის სიმაღლე კედლის სიმაღლის მესამედს არ უნდა აჭარბებდეს. ამ შემთხვევაშიც ოპტიმალური იქნება შუშებიანი ავეჯის გამოყენება გასაწევი კარებით, რაც მთლიან სივრცესაც დაზოგავს. სპეციალისტები გვირჩევენ, რომ უმჯობესია, ავეჯის ფერი კედლების იდენტური ან მათთან მაქსიმალურად მიახლოებული იყოს. სამზარეულოს შემთხვევაში, შეგიძლიათ, ამ ტონებში კედლებზე დასაკიდებელი კარადები გადაწყვიტოთ, ქვედა ნაწილისთვის კი სხვა ფერი შეარჩიოთ. ვიზუალური ეფექტისთვის კარგი იქნება, თუ სამზარეულოს ვერტიკალურ ზოლებს, ე.წ. დაფრეზილ ზედაპირს გაუკეთებთ.
ვერტიკალური შტრიხები, მაგალითად რბილი პანელები საძინებელშიც გამოგადგებათ. არჩევანი გააკეთეთ დაბალ საწოლსა და ღია ფერის, თხელ დეკორზე, რათა ფართი მაქსიმალურად შეინარჩუნოთ.
ამ რეკომენდაციებს თუ გაითვალისწინებთ, თქვენი დაბალჭერიანი ბინის ინტერიერი მომხიბვლელი, ჰარმონიული და საინტერესო იქნება, სივრცე კი უფრო ბევრად მაღალი გამოჩნდება. რჩევების პრაქტიკაში რეალიზებისთვის კი „დომინოს“ ფილიალებში შემოგვიარეთ: ჩვენი კონსულტანტების დახმარებით, ბევრ საინტერესო მასალასა და ნივთს აღმოაჩენთ.