როგორ შევქმნათ მშვიდი და სასიამოვნო ინტერიერი

ინტერიერი, განსაკუთრებით კი იმ სივრცის, სადაც ვცხოვრობთ, ჩვენს სიმშვიდეზე, განწყობებსა და ემოციურ მდგომარეობაზე დიდ გავლენას ახდენს. მისი სწორად შერჩეული ცალკეული ელემენტები — ფერები, განათება, დეკორი თუ ავეჯი კი გვიქმნის სასიამოვნო გარემოს, რომელიც სრულფასოვან დასვენებაში გვეხმარება.

თუ თქვენც მშვიდი და მყუდრო დიზაინი მოგწონთ, იცოდეთ, რომ მის შესაქმნელად განსაკუთრებული ძალისხმევა არ გჭირდებათ. პროფესიონალების ჩარევის გარეშე, თავადაც შეგიძლიათ სახლი ისე მოაწყოთ, რომ რთული დღის შემდეგ კომფორტულადაც დაისვენოთ და საუკეთესო განწყობაც შეიქმნათ. დეტალებისთვის, გირჩევთ, ჩვენს  ბლოგპოსტს გაეცნოთ: მასში ბევრ საყურადღებო რეკომენდაციას აღმოაჩენთ.

სადა, მონოქრომული ფერები

ფერები არა მარტო სასურველი გარემოს, არამედ ადამიანების განწყობის შექმნაშიც განსაკუთრებულ როლს ასრულებს. რა თქმა უნდა, როცა სიმშვიდეზე ვსაუბრობთ, პირველ რიგში, პასტელური ტონები უნდა ვახსენოთ: სპეციალისტები ყველაზე ხშირად ამ მიზნით სწორედ კრემისფერს, ნათელ ნაცრისფერს, ცისფერს, პიტნისფერს, ვარდისფერს, ატმისფერსა და სხვა ნეიტრალურ ფერებს იყენებენ. რა თქმა უნდა, არ არის აუცილებელი კედლის საფარის შერჩევისას, საღებავი იქნება ის თუ შპალერი, მხოლოდ ერთი კონკრეტული ტონით შემოიფარგლოთ. როგორც დიზაინერები გვირჩევენ, რომ სიმშვიდე ინტერიერში ერთი ფერის სხვადასხვა ტონალობასაც შემოაქვს.

ზოგადად, გაითვალისწინეთ, რომ თუ ნაკლებად სტრესული გარემოს შექმნა გსურთ, უმჯობესია, მკვეთრი ფერების გადაჭარბებით გამოყენებას თავი აარიდოთ. თუმცა, არც სრული ერთფეროვნებაა ტრენდული. მცირე, კაშკაშა დეტალები განსაკუთრებულ და აუცილებელ ენერგიას გვაძლევს, თუმცა მნიშვნელოვანია, ზომიერება დაიცვათ, რათა ფერებმა საბოლოოდ გამაღიზიანებელი გავლენა არ მოახდინოს. თუ ამ ტრენდის მიყოლას გადაწყვეტთ, მაშინ გირჩევთ, მკვეთრ ტონებს ძალიან ნეიტრალური თეთრი ან რძისფერი შეუხამოთ.

მზის ზომიერი შუქი

თანამედროვე დიზაინერები განსაკუთრებულ ყურადღებას საკმარის ბუნებრივ განათებას აქცევენ. როგორც წესი, მზის სხივები განწყობასთან ერთად, შრომისუნარიანობას ამაღლებს და ენერგიასაც გმატებთ. თუმცა, ისიც გაითვალისწინეთ, რომ სიმშვიდისა და დასვენებისთვის, მით უფრო საძინებელში, სულ სხვაგვარი, ნაკლებად გადანათებული გარემო გჭირდებათ.

სწორედ ამიტომ, ბინის დაგეგმვას რომ დაიწყებთ, მოსასვენებელი სივრცე სამხრეთ-აღმოსავლეთით, სამხრეთ-დასავლეთით ან დასავლეთით გამოყავით. ამ ნაწილებში მზის შუქი ნაკლებად ინტენსიური და შემაწუხებელია, ხოლო ტემპერატურა ზაფხულშიც კი ოპტიმალურ ნიშნულს ინარჩუნებს. 

მაგრამ თუ ბინაში მზის სხივები ბუნებრივად ინტენსიურია, შეგიძლიათ, მშვიდი გარემოს შესაქმნელად ჟალუზები ან ფარდა-შალუზები გამოიყენოთ, ან თუნდაც ორი სახეობის — გამჭვირვალე და სქელი ფარდები დაკიდოთ.

რბილი განათება

სწორად შერჩეულ განათებას სიმშვიდის, მხნეობისა და კარგი განწყობის შექმნა შეუძლია. ეს ინტერიერის ის ელემენტია, რომელიც ერთი ჩამრთველით ბინაში მთელ ატმოსფეროს წამიერად ცვლის.

შესაბამისად, სპეციალისტების არჩევანი, როგორც წესი, მრავალდონიანი, მაგრამ, ამავდროულად, მარტივად რეგულირებადი განათების დამონტაჟებისკენ იხრება. მათი კიდევ ერთი რეკომენდაცია ასეთია: სიმყუდროვისთვის განათება არა პირდაპირ ზემოდან ქვემოთ, არამედ დახრილად, გვერდიდან უნდა მოემართებოდეს. ამას გარდა, კარგი იქნება, თუ უპირატესობას თბილ, ყვითელ ნათებას მიანიჭებთ. ის მართლაც იდეალურად მშვიდ ატმოსფეროს შეგიქმნით.

მასალები და ფორმები

გლუვი და ცივი ზედაპირები — ბეტონი, მეტალი და შუშა ძალიან თანამედროვედ და შთამბეჭდავად გამოიყურება, თუმცა სიმყუდროვისა და სიმშვიდისთვის ნაკლებად გამოიყენება. ამ მიზნით, სპეციალისტები უმეტესად ნატურალურ ხეს, ბამბუკს, რატანს, ტყავს, ნაჭერსა და მსგავს ფაქტურებს იყენებენ

რაც შეეხება ფორმებს, როგორც წესი, მშვიდ ატმოსფეროს ყველაზე მეტად მომრგვალებული ფორმები მიესადაგება. ეს ტრენდი ბოლო პერიოდში ძალიან პოპულარულია და სწორედ დაცულობისა და ჰარმონიულობის ასოციაციას უკავშირდება.

ხმის იზოლაცია

ვერცერთი თანამედროვე, თუნდაც სრულყოფილი დიზაინი ვერ მოგანიჭებთ სიმშვიდეს, თუ ბინაში მუდმივად ქუჩიდან ან მეზობელი სახლებიდან შემომავალი, მკვეთრი ხმაური იქნება. თანამედროვე მწარმოებლები ამ პრობლემას მრავალფეროვანი მასალებით მარტივად აგვარებენ, ამიტომ გირჩევთ, ხმის იზოლაციის გამოყენებაზე რემონტის ადრეული სტადიიდანვე იფიქროთ. ცხადია, ეს ეტაპი დამატებით ფინანსურ რესურსს მოითხოვს, თუმცა, სამაგიეროდ, კომფორტი და სიმყუდროვე გარანტირებული გექნებათ.

თუ რემონტს ჯერ არ აპირებთ, მაგრამ ხმაური ძალიან გაწუხებთ, შეგიძლიათ, მისი სიმკვეთრე სქელი ფარდებით, შალის ხალიჩებითა და კედელთან მიდგმული რბილი ავეჯი ცოტათი მაინც შეამციროთ.

დეკორი

სხვათა შორის, მშვიდი ინტერიერის შექმნის მსურველებს დიზაინერები ვიზუალური ხმაურის შემცირებასაც ურჩევენ. უმჯობესია, ლარნაკების, ხელნაკეთი ნივთებისა და სუვენირების განთავსებისას ზომიერება დაიცვათ და სახლი საგამოფენო დარბაზს არ დაამსგავსოთ.

თანამედროვე რეკომენდაცია კი ასეთია: ინტერიერი გაცილებით ეფექტური და მშვიდი იქნება, თუ მრავალრიცხოვან დეკორს ფოტოებით, აკვარიუმით ან მცენარეებით ჩაანაცვლებთ.

მცენარეები

ნებისმიერ მცენარეს ქალაქურ ბინაში სიცოცხლის ელფერი შემოაქვს. ის არა მარტო აჯანსაღებს ჰაერსა და გარემოს, არამედ მართლაც ამცირებს სტრესს. მცენარეების ფერები, ზოგ შემთხვევაში კი არომატიც, ადამიანის ფსიქიკაზე დადებით გავლენას ახდენს.

თუმცა გაითვალისწინეთ, რომ გადაჭარბებულმა რაოდენობამ შეიძლება სივრცე ძალიან დაავიწროოს და  ვიზუალური ჰარმონიაც დაარღვიოს. შესაბამისად, ზომიერების დაცვა ამ  ამ შემთხვევაშიც დაგჭირდებათ.

ნებისმიერი ინტერიერის შექმნამდე „დომინოს“ ფილიალებში გვესტუმრეთ. ამ ბლოგპოსტში მოთხრობილ რეკომენდაციებს ჩვენი კონსულტანტები თქვენს კონკრეტულ მოთხოვნებზე მორგებულ პროფესიულ რჩევებსაც დაუმატებენ და ყველაზე მშვიდი, სასიამოვნო გარემოს შექმნაში დაგეხმარებიან.