როგორ მოვაწყოთ თანამედროვე ოთახი ბავშვებისთვის
ნებისმიერი ბინის დაგეგმვისას იმ ადამიანების ინტერესებისა და საჭიროებების გათვალისწინებაა აუცილებელი, რომლებმაც იქ უნდა იცხოვრონ. განსაკუთრებული ყურადღება კი ასეთ დროს ბავშვებს ეთმობათ, რადგან მათთვის განკუთვნილი სივრცე, კომფორტთან ერთად, უსაფრთხოებასა და არაერთი ნიუანსის ცოდნას მოითხოვს.
ამ ბლოგპოსტში სწორედ ბავშვების ოთახის მოწყობაზე გიამბობთ. გაგაცნობთ სასარგებლო რჩევებს, რომლებიც თქვენი შვილებისთვის ჯანსაღი და მყუდრო სივრცის ორგანიზებაში დაგეხმარებათ.
დაგეგმვა და ზონირება
ბავშვების ოთახის რემონტისას ყველაზე გავრცელებული შეცდომა ფართის არასწორად განსაზღვრაა. ხშირად მშობლები პატარებს მომცრო სივრცეს უთმობენ ხოლმე, სინამდვილეში კი მათ გაცილებით დიდი ზომის, მრავალფუნქციური ფართი სჭირდებათ. შესაბამისად, როდესაც ბინის დაგეგმვას დაიწყებთ, ეს ფაქტორი აუცილებლად გაითვალისწინეთ.
რაც შეეხება უშუალოდ ოთახს, გახსოვდეთ, რომ არანაკლებ მნიშვნელოვანია მისი სწორად ზონირებაც. როგორც წესი, სივრცე ბავშვის ასაკის შესაბამისად იგეგმება ხოლმე, თუმცა არსებობს უნივერსალური მიდგომაც, რომელიც ოთახში საძინებელი, სასწავლო და სათამაშო კუთხეების გამოყოფას გულისხმობს.
საძინებელ ზონაში აუცილებლად სრულფასოვანი ზომის საწოლის ადგილი განსაზღვრეთ. უსაფრთხოების სტანდარტებიდან გამომდინარე, ეცადეთ, ის ფანჯრიდან ან კარადებიდან მოშორებულ ნაწილში განათავსოთ, საწოლის უკანა კედელზე კი არ დაკიდოთ დიდი სურათები, წიგნის თაროები ან ისეთი ნივთები, რომლებიც ჩამოვარდნის შემთხვევაში ბავშვისთვის სახიფათო შეიძლება იყოს.
რაც შეეხება სასწავლო ზონას, ეს სივრცე საწერი მაგიდის, სკამისა და ღია ან დახურული თაროებისგან შედგება ხოლმე, სათამაშო ნაწილის მოწყობა კი მაინც ბავშვის ასაკზეა დამოკიდებული: ზოგს სპორტული აქტივობები მოსწონს, ზოგს — ინტელექტუალური, ზოგსაც ჯერ კიდევ მარტივი სათამაშოებით გართობა სჭირდება, ამიტომ მთავარია, დაგეგმარებისას შესაბამისი დანიშნულების კუთხე გამოყოთ, დანარჩენზე კი მოგვიანებითაც შეგიძლიათ იზრუნოთ.
რა თქმა უნდა, ამ ძირითადი ნაწილების გარდა, აუცილებლად უნდა გქონდეთ სივრცეები კარადებისთვის, კალათებისა და ყუთებისთვის, სადაც არა მარტო ტანსაცმელს, არამედ სათამაშოებსაც შეინახავთ.
აქვე იმასაც გეტყვით, რომ სპეციალისტები ეფექტური ზონირებისთვის სხვადასხვა შესაძლებლობებსაც გვთავაზობენ და გვირჩევენ, ფუნქციური დაყოფისთვის ტიხრები, თაროები, ფერების ან განათებების კომბინაციები გამოვიყენოთ.
მასალების შერჩევა და უსაფრთხოება
ზოგადად ეკოლოგიურად სუფთა მასალების გამოყენება თანამედროვე რემონტის ერთ-ერთი მნიშვნელოვანი ტრენდია, თუმცა მისი როლი ბავშვების ოთახის მოწყობისას კიდევ უფრო იზრდება. დღესდღეობით აღარავინ დავობს, რომ ამ სივრცისთვის აუცილებლად ხარისხიან, ეკოლოგიურად სუფთა და უსაფრთხო მასალებს უნდა მივანიჭოთ უპირატესობა. შესაბამისად, სპეციალისტების არჩევანი თაბაშირ-მუყაოზე, მდფ-ზე, პარკეტზე, ხისა და კორპის ფაქტურებზე, ჰიპოალერგიულ საღებავებსა და საფარზე ჩერდება.
ზოგადი რეკომენდაცია კი ასეთია: როცა საბავშვო ოთახის გასარემონტებლად თუ მოსაწყობად, მასალების შეძენას გადაწყვეტთ, მათი შემადგენლობით აუცილებლად დაინტერესდით. ამას გარდა, ყურადღება მიაქციეთ ეკოლოგიური უსაფრთხოების დამადასტურებელ სერტიფიკატებსაც და შეეცადეთ, პატარებისთვის განკუთვნილ სივრცეში ნაკლებად იყოს სინთეტიკა და მასალები, რომლებიც მტვერს ბუნებრივად აკავებს.
მნიშვნელოვანია უსაფრთხოების დაცვაც: მაგალითად, ოთახის კედლებისთვის კუთხოვანების გამოყენება და ისეთი ჩამრთველებისა თუ როზეტების დამონტაჟება, რომლებსაც სპეციალური ჩამკეტები აქვს. ეს ბავშვებს პოტენციური საფრთხეებისგან დაიცავს. გაითვალისწინეთ, რომ იატაკის საფარი გლუვი, მაქსიმალურად მდგრადი, სითბოს შემანარჩუნებელი და მარტივად მოსავლელი უნდა იყოს, რადგან მისი დასუფთავება, სავარაუდოდ, ხშირად მოგიწევთ. არ გამოგრჩეთ იატაკის საფარის გადაბმა და მისთვის ისეთი ოპტიმალური სიმაღლის შერჩევა, ბავშვი რომ არ წაიქცეს.
სტილი და ფერები
საბავშვო ოთახების დიზაინი, ძირითადად, ნაკლებად გადატვირთულია ხოლმე. სპეციალისტებიც მყუდრო, თანამედროვე, სადა სტილსა და პასტელურ, მშვიდ, ღია ფერებს გვირჩევენ, რომლებსაც შემდეგ, სურვილის შემთხვევაში, დეტალებითა და აქსესუარებით გავახალისებთ. მათივე რეკომენდაციით, ასეთი დიზაინი პატარების ნერვიულ სისტემასა და მშვიდ ძილზეც პოზიტიურად მოქმედებს.
ზოგჯერ მშობლები შვილების თხოვნით ოთახს თემატურ დიზაინსა და ფორმებს არგებენ. რა თქმა უნდა, პატარები სივრცის მოწყობაში აუცილებლად უნდა მონაწილეობდნენ, თუმცა გაითვალისწინეთ, რომ ბავშვები მალე იზრდებიან, გემოვნება და სურვილებიც ეცვლებათ და რაც დღეს კომფორტულად ეჩვენებათ, ხვალ შესაძლოა, საერთოდ აღარ მოეწონოთ, თქვენ კი დიზაინის საფუძვლიანად გადაკეთება მოგიწიოთ. შესაბამისად, სჯობს, ისეთი სტილი და ფერები შეარჩიოთ, რომლებსაც საჭიროების შემთხვევაში მარტივად შეცვლით.
განათება
განათება ბავშვისა და მისი ჯანმრთელობისთვის განსაკუთრებით მნიშვნელოვანია, ამიტომ შეეცადეთ, რემონტის საწყის ეტაპზევე, როცა ელექტრობას გაიყვანთ, ბუნებრივი სინათლის ხარისხს სათანადო ყურადღება მიაქციოთ.
ბავშვის ოთახის განათების დაგეგმვისას აუცილებელია, გახსოვდეთ, რომ ძირითადი ჭაღი მთელ სივრცეში თანაბარ შუქს უნდა უზრუნველყოფდეს. არ დაგავიწყდეთ სხვადასხვა ზონაში განათების დამატებაც: სასწავლო კუთხეში მაგიდის სანათი დაგჭირდებათ, საწოლთან კი — ბრა.
სანამ ბავშვის ოთახის რემონტს დაიწყებთ, „დომინოში“ შემოგვიარეთ. ჩვენი ჰიპერმარკეტის ორივე ფილიალში არაერთ ხარისხიან მასალასა და ნივთს ნახავთ, რომლებიც თქვენი პატარების უსაფრთხო და კომფორტული სივრცის მოწყობისას დაგჭირდებათ.