როგორ გამოვიყენოთ ორიგინალურად ფანჯრის რაფები

სივრცის მაქსიმალური ათვისება და თითოეული კუთხის ფუნქციური დატვირთვა თანამედროვე დიზაინერების ერთ-ერთი გამოწვევაა, განსაკუთრებით მაშინ, როდესაც ბინის ფართი პატარაა. სწორედ ამიტომ, კომფორტული, მოსახერხებელი ინტერიერის შესაქმნელად, პროფესიონალები უკვე არაერთ ექსპერიმენტულ, თამამ ხერხებს გვთავაზობენ და შეიძლება ითქვას, რომ საკმაოდ სახასიათო და დასამახსოვრებელ გადაწყვეტებსაც ქმნიან.

ერთ-ერთი მათგანია ფანჯრების რაფების განსახვავებული ფუნქციონალით გამოყენებაც და მათთვის სრულიად ახლებური, თუმცა ამავდროულად ძალიან საინტერესო დანიშნულებით დატვირთვა. ჩვენს ახალ ბლოგპოსტში თქვენთვის სწორედ ეს ორიგინალური იდეები შევაგროვეთ.

პატარა ბაღი

ოთახის მცენარეები ფანჯრის რაფებზე დიდი ხანია, თავს იწონებენ, თუმცა თანამედროვე დიზაინერებმა უკვე პატარა ბაღის ორგანიზებისა და „მწვანე მეგობრების“ საინტერესოდ განლაგების შესაძლებლობაც მოგვცეს. გადახედეთ თქვენს რაფებს: თუ მათ ქვემოთ მცირე სტელაჟებს, ან თაროებსა და საკიდებსაც დაატევთ, ფანჯრებთან მართლაც ულამაზეს სივრცეს მოაწყობთ.

ერთადერთი, რაც აუცილებლად უნდა გაითვალისწინოთ, დღის შუქია: შეეცადეთ, თქვენს ორიგინალურ ბაღში მაღალი მცენარეები არ იყოს, რადგან ბუნებრივი სინათლე ბინაში ჯანსაღი გარემოს შესაქმნელად უფრო დაგჭირდებათ. 

წიგნის თაროები

როდესაც სახლში ბიბლიოთეკის მოწყობაზე გიყვებოდით, ფანჯრის რაფების ეს ფუნქცია მაშინაც ვახსენეთ. მათ ქვეშ კომპაქტური თაროების განთავსება არა მარტო წიგნებისთვის, არამედ სხვა საკანცელარიო ნივთებისთვისაც გამოგადგებათ. სივრცესაც დაზოგავთ და საყვარელი ავტორების ნაწარმოებებსაც კომფორტულად განათავსებთ.

იატაკიდან ფანჯრის რაფამდე საშუალო სიმაღლე 80-90 სანტიმეტრია. ასე რომ 2-3 თარო აუცილებლად დაგეტევათ. ღია იქნება ისინი, თუ დახურული, ეს თქვენი გადასაწყვეტია, თუმცა სასურველია, ყველა მათგანი ფანჯრის რაფის ფორმას იმეორებდეს. 

საწერი მაგიდა

საბავშვო ოთახში ან საძინებელში ფანჯრის რაფის საწერ მაგიდად გამოყენება ძალიან მარტივადაა შესაძლებელი. ზოგჯერ მას გვერდებზე, ორივე მხარეს თაროებსაც უმატებენ და კომფორტული სამუშაო კუთხის დატვირთვასაც აძლევენ.

თუ ფანჯრის რაფას საწერ მაგიდად საბავშვო ოთახში გამოიყენებთ, ამ სივრცეში ორი უმცროსკლასელი მოსწავლეც კი თავისუფლად იმეცადინებს.

მინი ტახტი  

ბოლო წლების ინტერიერის ერთ-ერთი ჰიტი სწორედ ესაა: ფანჯრის რაფაზე მოწყობილი პატარა მოსასვენებელი სივრცე ფუმფულა ბალიშით, მატრასითა და წინ გადაშლილი ულამაზესი პანორამული ხედით. გაითვალისწინეთ, რომ კომფორტულობისთვის რაფის ოპტიმალური სიმაღლე და სიგანე 40-50 სანტიმეტრი უნდა იყოს.

კომოდი

როცა ფანჯრის რაფა ფართოა, მის ქვემოთ მცირე ზომის კომოდი მარტივად განთავსდება. ის არც დიდ ადგილს დაიკავებს და თქვენც დამატებითი სათავსო გექნებათ. სხვათა შორის, შეგიძლიათ, კომოდი შეკვეთით დაამზადებინოთ და ზომები სივრცეს ზუსტად მოარგოთ. გირჩევთ, მას გასასრიალებელი კარები დაუყენოთ, რათა გამოსაყენებლად მაქსიმალურად მოსახერხებელი და კომფორტული იყოს.  

სამზარეულოს სამუშაო კუთხე

როცა პატარა სამზარეულო გაქვს, თითოეული მეტრიც მნიშვნელოვანია, ამიტომ ფანჯრის რაფები კარგად შეათვალიერეთ. ხომ არ შეგიძლიათ, ცოტა ზომაში გაზარდოთ და სამუშაო კუთხისთვის ან ნიჟარისთვის გამოიყენოთ? ბევრი ადამიანი ხომ სწორედ ასეთ სამზარეულოზე ოცნებობს: ამზადებ, ან რეცხავ და თან ფანჯრიდან ყურებით ტკბები. 

თუ ასეთი კუთხის მოწყობას გადაწყვეტთ, შემრევები და ნიჟარა საგულდაგულოდ შეარჩიეთ. ზომების დეტალური გათვალისწინება და შემრევის გახსნა-დაკეტვის მექანიზმს ასეთ დროს დიდი მნიშვნელობა აქვს.

ბარი

თუ ფანჯრის რაფა მაღალი, მაგალითად, 85-95 სანტიმეტრია, მაშინ ის ბარისთვისაც იდეალურად გამოდგება. ამ შემთხვევაშიც, თუ სამზარეულო არც ისე დიდია, ფანჯრის რაფაზე მოწყობილმა ბარის მაგიდამ შესაძლოა სამუშაო სივრცისა და მაგიდის ფუნქციაც შეითავსოს, ფართიც დაგიზოგოთ და სიმყუდროვეც შექმნას. 

სანამ ფანჯრის რაფების ახალი ფუნქციონალით დატვირთვას შეუდგებით, არ დაგავიწყდეთ, რომ „დომინოში“ შემოგვიაროთ: ჩვენს ფილიალებში თქვენი იდეების განხორციელებისთვის ბევრ საინტერესო ნივთს იპოვით.