რა უნდა ვიცოდეთ მოსწავლის კუთხის მოწყობაზე

სექტემბერი სკოლასა და სასწავლო წლის დაწყებასთან ასოცირდება. ამ დროს მშობლები ცდილობენ, ბავშვებს ისეთი გარემო შეუქმნან, რომ მეცადინეობის პროცესი მაქსიმალურად კომფორტული, მოტივაციის მიმცემი და პროდუქტიული იყოს. თუ თქვენც ერთ-ერთი მათგანი ხართ, ჩვენს ბლოგს გაეცანით: მასში მოსწავლის კუთხის მოწყობის შესახებ საინტერესო და პრაქტიკული რეკომენდაციები გავაერთიანეთ. რაც მთავარია, გახსოვდეთ, რომ ეს რჩევები ბავშვებისთვის წარმატებული სწავლისკენ გადადგმული მნიშვნელოვანი ნაბიჯებია.

სასწავლო კუთხის გამოყოფა

სინამდვილეში სასწავლო კუთხის მოწყობა საბავშვო ოთახის რემონტიდან და მისი სწორი ფუნქციური ზონირებიდან იწყება. სპეციალისტები გვირჩევენ, რომ პატარებისთვის განკუთვნილ სივრცეში საძინებელი, სასწავლო და სათამაშო კუთხეები თავიდანვე გავითვალისწინოთ.

ამგვარი მიდგომა არა მარტო ოთახის ორგანიზებაში დაგეხმარებათ, არამედ ბავშვსაც შესაბამის განწყობასა და მოტივაციას შეუქმნის. თუ არც ისე დიდი ფართი გაქვთ, გახსოვდეთ, რომ მოსწავლის კუთხის მოწყობა განსხვავებულ ადგილას, მაგალითად, ფანჯრის რაფაზეც კი შეგიძლიათ. 

საწერი მაგიდისა და სკამის შერჩევა

ძალიან მნიშვნელოვანი ნაბიჯი საწერი მაგიდისა და სკამის ოპტიმალურად შერჩევაა,  ორივე მათგანი მოსახერხებელი უნდა იყოს და თან მოსწავლეს კონცენტრირებაშიც დაეხმაროს.

დავიწყოთ მაგიდით: განსაკუთრებული ყურადღება მის სიგანეს მიაქციეთ. აუცილებელია, ბავშვმა ზედაპირზე რვეულები, წიგნები და სხვა ინვენტარი მარტივად დაალაგოს. თუ ოთახი პატარაა, უმჯობესია, უჯრებიანი მაგიდა შეიძინოთ. ის მოსწავლის ნივთების ორგანიზებაშიც დაგეხმარებათ, სივრცესაც დაზოგავს და საერთო დიზაინსაც ბევრად ეფექტურად წარმოაჩენს.

არანაკლებ მნიშვნელოვანია კომფორტული სკამიც, რომელიც მობილიზებას უწყობს ხელს და დაღლილობასაც ამცირებს. რაც შეეხება კონკრეტულ მახასიათებლებს, სპეციალისტები გამორჩეულ ყურადღებას სიმაღლეზე ამახვილებენ და რამდენიმე რჩევას გვაძლევენ: სკამსა და მაგიდას შორის დაშორება ისე უნდა შეირჩეს, რომ ბავშვს ფეხები 90 გრადუსით ჰქონდეს მოხრილი, იატაკზე ელაგოს და თან მათი თავისუფლად მოძრაობაც შეეძლოს.

სასურველია, სკამის საზურგე წელს ამაგრებდეს და მისი სიმაღლე რეგულირდებოდეს. გაითვალისწინეთ, რომ პატარა ასაკის მოსწავლისთვის, მით უფრო აქტიურისთვის, ბორბლებიანი სავარძლის ყიდვა გამართლებული ნაკლებადაა: ზედმეტი მოძრაობა მას ყურადღებას გაუფანტავს და კონცენტრაციაშიც ხელს შეუშლის. 

რაც შეეხება მასალებს, ცხადია, უმჯობესია, ისინი მაქსიმალურად ბუნებრივი და ეკოლოგიური იყოს. ამ მხრივ ხე საუკეთესო არჩევანი იქნება, თუმცა ლითონისა და პლასტმასისგან დამზადებული ნივთების შეძენაც შეგიძლიათ. ლითონის ბევრად გამძლე და თანამედროვე დიზაინისაა, პლასტმასის კი — ბიუჯეტური, მსუბუქი და მარტივად მოსავლელი. არ გამოგრჩეთ, რომ მაგიდაცა და სკამიც აუცილებლად ერგონომიული უნდა იყოს, რათა ბავშვის სხეულს სწორი მდგომარეობა, ხერხემალს კი სიჯანსაღე შეუნარჩუნოს.

განათება

სასწავლო კუთხის მოწყობისას განათება ერთ-ერთი საკვანძო ფაქტორია. სპეციალისტების რეკომენდაციით, ამ სივრცის განათება ჩრდილებს უნდა გამორიცხავდეს და თანაბარი სინათლის იყოს. კარგი გადაწყვეტილება იქნება ჭერის ნათურების ან ჭაღის მონტაჟი. მათი რაოდენობა და ზომა ოთახის ფართობით უნდა შეირჩეს. მთავარია ამ შემთხვევაში ისაა, რომ შუქი სწორად ნაწილდებოდეს.

მოსწავლის კუთხისთვის აუცილებლად დაგჭირდებათ მაგიდის სანათიც. უმჯობესია, მას  სინათლის სიმძლავრისა და მიმართულების რეგულირების მექანიზმიც ჰქონდეს. გაითვალისწინეთ, რომ სანათს მაგიდის ზედაპირიდან 30-40 სანტიმეტრი უნდა აშორებდეს, შუქი კი 30-45 გრადუსიანი კუთხით იხრებოდეს. გახსოვდეთ: თუ ბავშვი ცაციაა, სანათი აუცილებლად მარჯვენა მხარეს განათავსეთ. ასე წიგნის კითხვა ან კომპიუტერის ეკრანთან ყოფნა მისთვის ბევრად კომფორტული იქნება. 

რეგულარულად გაწმინდეთ ნათურები, რადგან მტვერი შუქის ინტენსივობასა და ხარისხს, შესაბამისად, ბავშვის პროდუქტიულობასაც ამცირებს. მოერიდეთ ძალიან თბილ, ყვითელ ან პირიქით, ცივ, მოლურჯო ნათებას. ყვითელი არასამუშაო, მყუდრო გარემოს ქმნის, ლურჯი კი თვალებს ძაბავს. საუკეთესო გადაწყვეტილება ნეიტრალური თეთრი (4000-5000 კელვინი) იქნება. თუ მაგიდის სიახლოვეს თაროებს ან სტელაჟებს განათავსებთ, შეგიძლიათ, ლენტური თბილი განათებით ისინი გააფორმოთ, ან კედელზე დამატებითი ბრები დაამაგროთ, დიზაინს განსაკუთრებული ელფერი შემატოთ და სასწავლოსთან ერთად, შემოქმედებითი ან დასასვენებელი განწყობები შექმნათ.

სათავსოები მოსწავლის ნივთებისთვის

სათავსოების სწორად ორგანიზება მოსწავლეს აუცილებელი ნივთების სწრაფად მოძიებასა და წესრიგის შენარჩუნებაში დაეხმარება.

ასეთ დროს საუკეთესო გადაწყვეტილება სტელაჟებისა და კედლის თაროების განთავსებაა, თუმცა პატარა ტუმბოებისა და ყუთების გამოყენებაც შეგიძლიათ. აუცილებლად შეიძინეთ ორგანაიზერები ფანქრების, კალმების, ფურცლებისა და სხვა მცირე ზომის ნივთებისთვის, მიუსადაგეთ ისინი მაგიდის ზედაპირის ზომას ისე, რომ ზედმეტად დიდი ადგილი არ დაიკავონ. გაითვალისწინეთ, რომ ორგანაიზერებს ბავშვი მარტივად უნდა მისწვდეს.

სხვათა შორის, შეგიძლიათ, გამოიყენოთ კრეატიული, ფერადი და განსხვავებული ფორმების სათავსოები, რომლებიც დეკორის ფუნქციასაც შეასრულებს.

დამატებითი დეტალები

თუ სასწავლო კუთხეში დიდი ფართია, შეგიძლიათ, ის დამატებით ზონებად დაყოთ. მაგალითად, კითხვის ან დასვენებისთვის მცირე ზომის სავარძელი ან დივანი დადგათ, იატაკის ტორშერით კი დამატებითი სიმყუდროვე შექმნათ. კარგი გადაწყვეტილება იქნება მინი საბავშვო ბიბლიოთეკის მოწყობაც და კედლების თაროებზე მოსწავლისთვის საყვარელი წიგნების განთავსება.

ბავშვებს ძალიან მოსწონთ დაფები, რომლებიც არა მარტო მეცადინეობისთვის, არამედ გეგმების, მნიშვნელოვანი თარიღებისა და შენიშვნებისთვის შეგიძლიათ გამოიყენოთ. შემოქმედებითი აქტივობების მოყვარულებს გამოადგებათ მცირე ზომის დამატებითი მაგიდაც, სადაც ისინი ხატვასა და ძერწვას შეძლებენ. განსაკუთრებით სპორტულებისთვის კი შეგიძლიათ სავარჯიშო ძელი, შვედური კედელი ან კალათბურთის ფარი განათავსოთ. მეცადინეობისას, შუალედებში, მცირე ფიზიკური აქტივობა მოსწავლისთვის მხოლოდ სასარგებლო იქნება.

და ბოლოს: აუცილებლად გაითვალისწინეთ ბავშვის სურვილები. ბევრ მათგანს უნდა, რომ სივრცე  საყვარელი თემატიკით — ფეხბურთით, კოსმოსით, რომელიმე პერსონაჟისთვის დამახასიათებელი სტილით გააფორმოს, ამიტომ დაეკითხეთ მასაც.

კომფორტული და ფუნქციური კუთხე მოსწავლეს დამატებით მოტივაციას აუცილებლად შეუქმნის, ამიტომ „დომინოს“ ფილიალებში გამოგვიარეთ. სასწავლო კუთხის მოსაწყობად ჩვენთან ბევრ საინტერესო ნივთს აღმოაჩენთ.