როცა სახლის ან ოფისის განახლებას ვგეგმავთ, ერთ-ერთი პირველი ნაბიჯი ყოველთვის ფერის შერჩევაა. კედლების ფერი ჩვენი ინტერიერის განწყობას ქმნის - თეთრი ფერი ოთახში სისუფთავისა და ჰაეროვნების შეგრძნებას გვიქმნის, პასტელური ტონები სიმშვიდესა და სითბოს მატებენ, მკვეთრ ფერებს კი ენერგია და პოზიციური განწყობა შემოაქვთ, ხოლო ღრმა და მუქი ტონები სოლიდურობასა და ელეგანტურობას ასხივებენ. ხშირად ყურადღება მთლიანად ფერზეა გადატანილი, მაგრამ არის ერთი მნიშვნელოვანი დეტალი, რომელიც თითქმის უხილავი რჩება, თუმცა საბოლოო ჯამში გადამწყვეტ როლს თამაშობს. ეს დეტალი არის საღებავის ბაზა.

ბაზა თითქოს უხილავი საფუძველია, რომელზეც ფერი „იშლება“. სწორედ ის განსაზღვრავს, რამდენად სწორად გამოჩნდება ტონი, რამდენი ფენა დასჭირდება კედელს, როგორ დაფარავს საღებავი ზედაპირს და რამდენ ხანს შეინარჩუნებს ის პირვანდელ იერს. შეიძლება ითქვას, რომ ბაზა ფერის საიდუმლო არქიტექტორია - თუ მას სწორად შეარჩევთ, თქვენი კედელი ზუსტად ისეთი გამოვა, როგორსაც წარმოიდგენდით.

რა არის საღებავის ბაზა?

ბაზა არის საღებავის საწყისი მასა, რომელსაც ჯერ კიდევ არ აქვს განსაზღვრული ფერი. ის შეიძლება იყოს თეთრი, ოდნავ შეღებილი ან თითქმის გამჭვირვალე. ფერის მისაღებად მასში ემატება სპეციალური პიგმენტები, ხოლო შედეგი სწორედ მათი და ბაზის ურთიერთქმედებაზეა დამოკიდებული. ბაზებს შორის მთავარი განსხვავება თეთრი პიგმენტის - ტიტანის დიოქსიდის რაოდენობაა. რაც უფრო მეტია ეს კომპონენტი, მით უფრო ღია და დაფარვისუნარიანია საღებავი. რაც ნაკლებია, მით უფრო მუქი და მკვეთრი ფერის მიღებაა შესაძლებელი, თუმცა დაფარვა სუსტდება და შესაძლოა რამდენიმე ფენის დატანა დაგჭირდეთ.

ბაზების ტიპები

საღებავის ბაზებს ტრადიციულად ოთხ ძირითად კატეგორიად ყოფენ: A, B, C და D. თითოეულ მათგანს თავისი როლი აქვს.

A ბაზა ყველაზე ღიაა. მასში თეთრი პიგმენტის დიდი რაოდენობაა, ამიტომ იდეალურია თეთრი, კრემისფერი და სხვა პასტელური ტონებისთვის. მისი მთავარი უპირატესობა ძლიერი დაფარვაა - ხშირად საკმარისია მხოლოდ ერთი ან ორი ფენა, რათა კედელი სრულყოფილად გამოიყურებოდეს. მისი გამოყენება შეგიძლიათ თეთრ ფერში ზედაპირების შეღებვისთვის ტონირების გარეშეც. 

B ბაზა უფრო მოქნილი ვარიანტია. მასში თეთრი პიგმენტი საშუალო რაოდენობითაა, ამიტომ ის კარგად მუშაობს საშუალო ტონებში: არც ძალიან ღია და არც ძალიან მუქი. ასეთ ბაზაზე მიღებული ფერი რბილი და თანაბარია, დაფარვაც საკმაოდ მაღალია.

C ბაზა თითქმის გამჭვირვალეა. მასში თეთრი პიგმენტი თითქმის არ არის, რის გამოც სწორედ ის გამოიყენება მკვეთრი, ცოცხალი ფერების მისაღებად: წითელი, ნარინჯისფერი, მწვანე ან ლურჯი ასეთ ბაზაზე ყველაზე ეფექტურად გამოიყურება. თუმცა მისი მინუსია სუსტი დაფარვა - ასეთ ფერებს თითქმის ყოველთვის ორი ან სამი ფენა სჭირდებათ იმისათვის, რომ კედელი სრულად დაიფაროს.

D ბაზა კი ყველაზე ღრმა და მუქი ტონებისთვისაა შექმნილი. შავი, მუქი ნაცრისფერი, ბორდოსფერი ან მუქი ლურჯი სწორედ ამ ბაზაზე იქმნება. თეთრი პიგმენტი აქ მინიმალური რაოდენობითაა, ამიტომ ფერი გამოდის სიღრმისეული, მდიდარი და ელეგანტური. მაგრამ როგორც C ბაზის შემთხვევაში, აქაც საჭიროა რამდენიმე ფენა თანაბარი შედეგის მისაღწევად.

რამდენი საღებავი დაგჭირდებათ?

საღებავის შერჩევისას კიდევ ერთი მნიშვნელოვანი საკითხია რაოდენობა. ხშირად მომხმარებლები ზედმეტად ბევრ ქილას ყიდულობენ ან პირიქით, თვლიან, რომ ერთი ქილაც ეყოფათ. ამ პრობლემის თავიდან ასაცილებლად, საჭიროა წინასწარ გათვალოთ კედლის ფართობი - გაზომოთ შესაღები ზედაპირების სიმაღლე და სიგრძე, გადაამრავლოთ ერთმანეთზე და მიიღოთ კვადრატულობის მაჩვენებელი.

შემდეგი ნაბიჯია ბაზის ტიპის შერჩევა. ღია და საშუალო ტონები (A და B ბაზა) კარგად ფარავს და ნაკლები რაოდენობას ითხოვს. მკვეთრი და მუქი ფერები (C და D ბაზა) უფრო გამჭვირვალეა, ამიტომ შესაძლოა მეტი საღებავი დაგჭირდეთ. ასევე მნიშვნელოვანია კედლის მდგომარეობაც — პრაიმერით დამუშავებული და გლუვი ზედაპირი საღებავს ნაკლებად ხარჯავს, ხოლო უხეში ან მუქი ფონით დაფარული კედელი უფრო მეტ მასალას ითხოვს. საშუალო მაჩვენებელი ასეთია: ერთი ლიტრი საღებავი ფარავს დაახლოებით 8–12 კვადრატულ მეტრს ერთი ფენით.

რატომ არის სწორი ბაზის არჩევა გადამწყვეტი?

ბაზა არის ის „უხილავი დეტალი“, რომელიც საბოლოო შედეგს განსაზღვრავს. სწორად შერჩეული ბაზა უზრუნველყოფს ფერის ზუსტ დასმას, ზედაპირების თანაბრად დაიფარვას, და ინტერიერი სილამაზის შენარჩუნებას დიდი ხნის განმავლობაში. თუ ბაზას არასწორად შეარჩევთ - შეიძლება ვერ მიიღოთ ის ფერი რომელსაც წარმოიდგენდით ინტერიერის დაგეგმვის დროს.

პრაქტიკული რჩევები

გამოცდილება გვიჩვენებს, რომ ღია ფერები, რომელთა ბაზაც A ტიპისაა, ჩვეულებრივ 1–2 ფენაში სრულყოფილ შედეგს იძლევა. B ბაზაზე მიღებული საშუალო ტონები ყველაზე კარგად გამოიყურება ორფენიანი შეღებვისას. C და D ბაზები, სადაც მკვეთრი და მუქი ფერებია, თითქმის ყოველთვის მოითხოვს 2–3 ფენას. სწორედ ამიტომ მნიშვნელოვანია ზედაპირის პრაიმერით დამუშავება - ეს ფერს უფრო გამძლესა და თანაბარს ხდის. გარდა ამისა, სასურველია, რომ შეღებვამდე სატესტო ფენა დატანოთ, რათა დარწმუნდეთ, რომ ფერი განათების პირობებში ზუსტად ისეთი ჩანს, როგორიც გრუსდად.

დასკვნა

საღებავის ბაზა შეიძლება უმნიშვნელო დეტალად მოგეჩვენოთ, მაგრამ სინამდვილეში სწორედ ის არის სწორად დასმული ფერების მთავარი მიზეზი. A ბაზა შექმნილია ღია და პასტელური ტონებისთვის, B - საშუალო ფერებისთვის, C - მკვეთრი და ენერგიული ფერებისთვის, ხოლო D - ღრმა და მუქი ტონებისთვის.

თუ წინასწარ სწორად შეარჩევთ ბაზას, გამოთვლით რაოდენობას და ზედაპირსაც სათანადოდ მოამზადებთ, თქვენი კედლები იქნება სუფთა, ლამაზი და გამძლე. და რაც მთავარია, ინტერიერი შესძენს სწორედ იმ განწყობასა და ხასიათს, რის გამოც თქვენ ფერის შეცვლა გადაწყვიტეთ.

დომინოს ჰიპერმარკეტებსა და ონლაინ  სივრცეებში წარმოდგენილია საღებავების, ბაზებისა და სხვადასხვა ტიპის სახარჯი მასალების ფართო არჩევანი. თქვენი საოცნებო ვიზუალის მისაღებად შეგიძლიათ მიმართოთ ჩვენს სამშენებლო მასალების სექციის თანამშრომლებს, ხოლო ბაზების ტონირების სერვისის მიღება შესაძლებელია სრულად უფასოდ ჩვენს ჰიპერმარკეტებში.